Житие преподобного отца нашего Серапиона, архимандрита Черемшанского.

«Вифлеемъ - Дом Хлеба»
Выпуск 4 (апрель 2012)

Житие преподобного отца нашего 
Серапиона, архимандрита Черемшанского

Месяца апрелия во осьмыинадесять день память преподóбнаго и богоноснаго отца нашего Серапиона, Черемшанскаго чюдотворца, благослови отче.

прп Серапион Черемшанский

Сей преподóбныи отец наш Серапион родися от родителю благочести́ву в лето семь тысящ триста тридесять первое, и нарекóша имя ему Симеон. Отец же его, Иоанн зовóмыи, пореклом Абачин, бя́ше отрода купеческа. Переселижеся от отечествия своего, Нижеградских пределов, села Мурашкина во град Саратов. 

Симеон же óтрок возрасташе во страсе Бóжии и любви к божественным писанием. Прилежаше же опасно древлеблагочести́вому церковному предáнию, нови́н же беззаконных удаляшеся вконец и отрицаше. И толику являше любовь к божественному писанию, я́ко день и нощь упражнятися в чтении божественных словéс. 

Гонéния же еретическаго ради, яже возбраня́ху учитися чтению древлеправослáвным християном, почитоваше сей книги отáй, в подземелии дому родительскаго. И исполнився божественныя любве, áще и юн бя́ше возрастом телесным, мудростию же духóвною многих стáрец превзошéд, остави дом и срóдники своя, и возжеле жития мни́шескаго. И понеже бывшия преже близ Саратова Иргизския монастыри гонители разориша, пойде в стародубския пределы, во древлеблагочести́ваго предáния монастырь. 

Гонению же еретическому в Русии умножевшюся, со некиими благочести́выми християны прейде во иностранныя пределы, и вселися в турецкую землю, в Добруджю, во Славскии монастырь, и бысть мних. И наречеся имя ему Серапион. И тамо пребывая бя́ше и вовремя, егда паги святая Бóжия Церкви восприят первую свою добрóту, сиречь священныи архиерейскии чин обнови. Ибо в лето семь тысящ триста пятьдесят третие митрополит греческии Амбросии, познав правду древлеправослáвныя веры, совокупися ко святей Церкви и возобнови святительскии чин. И по летех пятинадесяти паки прииде во страну Русийскую, и вселися уграда Хвалынска, в месте нарицаеме Черемшан. И бысть начальник малому монастырю. 
И поставлен бысть во священныи иерейскии сан от преосвященнаго епи́скопа саратовскаго Афанасия, и́же таможе крыяшеся гонения ради ерети́ческаго, и бысть священнои́нок и игýмен. И вдаде ему епи́скоп малую платняную церковь со освящéнным путевым престóлом, еже есть святыи одикóн. И служаше во óной божественную службу крыяся, занеже во óны дни не леть бя́ше древлеправослáвным християном имети явно ни церкве, ни звона, ни ходов крéстных, ни литоргии, прещения ради ерети́ческаго. 
Монастырь же святаго пребываше сокровенне в вертограде девицы Феклы, пореклом Толтиковы, иже тайне прият мни́шескии образ со именем Фелицата.

Иногда же всéнощное творя́щу бдéние святому со братиею, праздника рáди воскресения Христóва, внезапу áки тáтие и разбойницы, влезоша воини во окно храмины, идеже беяше путная церковь, и яша всех обретшихся тáмо и всадиша в темницу во граде Хвалынсце. Оле дерзости, нуждаху бо несвященнии священных страдальцев отврещися священнаго и́ноческаго óбраза и древлеправослáвнаго свящéнства. Ввергоша же во юзилище и саму тую матерь Фелицату, и долее лета единаго пребыша безвиннии в непрáведном заточении. 
Бог же преми́лостивыи яви великое свое милосердие на иноцех сих, я́ко вложи в сердце начальника темницы любовь нелицемерну ко святым страдальцем. И попусти верным християном, да принесут во юзилище святыя книги и иконы, и священныя ри́зы, и вся, яже есть потребно для церковныя службы. Оле чю́до: как бысть темница и монастырь, и церковь Бóжия. 
И пребóльшее знамение яви Госпóдь паки: я́ко в нощь пресвéтлаго праздника Пáсхи Христóвой мнозии християне приидоша и внидоша в темницу, начальнику тако попустившу, составиша собор велии праздника Христóва рáди, и светло пресветлому воскресению во темницы праздниство духовное сотвори́ша. 
Последи же судии невернии, приговориша верных ко взысканию пенязей и телесней позорней казни. Обáче Бог суди иначе, я́ко в той самыи час, егда приведоша преподóбных страдалец на позóрище и уготовиша сосуды мучительныя, приспе внезапу вестник царскии, привез указ царев о возбранении всех телесных казний, и абие отпущени бышамниси.

Пáки же возвратися преподóбныи на Черемшан и пáки оби́тель составляет. И умножися число братии, и прейде на ново место выше по горé, еже Верхнии Черемшан нарицáется. И тáмо составися мужескии монастырь. Женскии же пребыть на Нижнем Черемшане, идеже пребываше мати Фелицата. 
По мнозех же летех вселися на Черемшане Иосиф Гончаров, бывыи преже последнии атаман казаков некрасовских, иже живяху вДобруджи. Сей бя́ше от мног лет знаем преподóбному Серапиону и любовь нелицемерну име ко святому. Бяше же знаем и самому царю тому Александру второму, иже и прежде многажды увещаваше Гончарова преселитеся от турецкия державы в Русию. Сей же Гончаров внят последи цареву совету и вселися на Черемшане и прииде к царю и прият бысть с великою честию. И испроси от царя устроити на Черемшане каменную церковь. И построиша соборную церковь во имя пресвятыя владычицы нашея Богорóдицы и Приснодéвы Марии честнаго и славнаго ея́ Успéния и Покрова. 
Гончаров же, стар сыи, изволи приити во мни́шескии чин, и пострижен бысть от святáго со именем Иоасаф и в мале времени преставися преже освящения церкви. 

В лето же семь тысящ триста девяностое месяца октября освятися соборная церковь от древлеправослáвных архиерéов, Амбросия епи́скопа Саратовскаго и Пафнутия епи́скопа Казанскаго и триех святых исповéдник, и́же на премногая лета претерпеша заточение за веру в темници суждальскаго монастыря: преосвящéннейшаго архиепи́скопа Аркадия Славскаго, и́же первее живяше во Славстем монастыри, идеже и преподóбныи Серапион в та же лета пострижен бысть; и блажéннаго Конона епи́скопа Новозыбковскаго; и славнаго страдальца Генадия епи́скопа Пермьскаго. Аркадии же святитель претерпе неправедное заточение втемницы лет двадесять и осмь, Конон же епи́скоп двадесять и шесть лет, преосвященныи же Генадии шестьнадесят лет. И чю́до б́яше зрéти, я́ко живии новии мученицы освящаху Бóжия олтари и мóщи древлих мученик во святилищих полагáху. 

Серапион зе святыи тóлику крóтость являше, я́ко и прошаше епи́скопа Амбросия, да отставит его от игуменския власти. Обáче архиерей не внят молению и не попусти светильнику быти подспýдом, но на свещнице того водрузи, я́ко не точию игýменства не отстави, но и архимандри́том сотворяет того. 
Бя́ше же святыи Серапион телом сух и взором приветен, излиха нищелюбив и ми́лостыни подáтель неоскуден. И бя́ше видети на киждо день множество проситель и нищых, ожидающих егда изы́дет преподóбныи ис церкве. И никтóже их николи́же отиде от преподóбнаго празден, и не получив прошения своего. Келарь же монастырскии пеня́ше святóму, áки бы разоряет оби́тель безмерныя рáди милостыни. Преподобныи же поучаше того от святых писании ненадеятися на богатство гиблющее, но точию на Бóга все упование имети и миловати нуждающыяся. 
И велии подвиг творяше преподóбныи, я́ко не точию железныя вери́ги ношаше непрестанно, но и на многая лßта кииждо день сам служаше святую литоргию и причащашася божественных Христóвых Тáин. Посещаше же присно и больныя братию и утешаше я. И на кииждо день почиташе братии божественная писания и толкования святы́х отéц. И сам при́сно учаше вся люди благочéстию и правой вере, и любви и страху Бóжию. 

И тако пожив вцеломудрии и добродетелех многих, поболе ногами мало днии, и причастився божественных Христóвых Тáин, и благослови́ братию, преставися коГóсподу, Егóже присно желаше и Емýже во всем житии своем не престанно бе работая, в лето семь тысящ четыреста шестое, месяца генваря в седьмыи день, на праздник Собóра святáго Иоанна Крестителя. 
И велие множество верных собрася на погребение святаго, и слезы проливáху над священным того телом. И погребóша того честне. И чрез десять лет обретоша святыя́ мóщи преподóбнаго отцá Серапиона нетленны и целы весьма. И множество народов сверою приступающе ко его гробу, покланя́хуся и лобызаху святыя́ мóщи, исцеления благодáть отнедуг приемлюще, и одержимии отдухов нечистых исцеля́хуся в монастыри том многажды по молитвам святáго.

Моли́твами Гóсподи угóдника Твоегó Серапиóна ниспосли́ на ны́ ми́лости Твоя́ и подáждь нам оставлéние грехóв, и сподóби при́сно угождáти Тебé, и воспевáти Тя Святýю Трóицу, Отцá и Сы́на и Святáго Дýха, ны́не и при́сно и вóвеки векóм, ами́нь.

Из журнала "Вифлеем - Дом хлеба", выпуск 4, апрель 2012 г.

 

Источник – http://www.blackmonk.ru/vifleem/vifleem04/v04119.shtml